“Əlilliyə Erkən Yardım Portec Şəbəkəsi” İctimai Birliyi “Əlilliyi olan şəxslər üçün sosial dəyişiklik – İnklüziv Forum Teatr” layihəsinin icrasını davam etdirir. 2025-ci il 10-11 iyun tarixlərində layihə çərçivəsində Bakı şəhərində yerləşən Alı Mustafayev adına 202 və Zakir Yusifov adına 194 saylı tam orta məktəblərdə sessiyalar təşkil olunub.

İctimai Birliyin sədri Gülnarə Pənahova bildirib ki, layihənin məqsədi forum teatrı vasitəsilə əlilliyi olan və olmayan gənclərin iştirakçılığını artırmaq, inklüziv cəmiyyətin inkişafına töhfə verməkdir. Sessiyalarda yeniyetmələr və gənclər arasında inklüzivlik dəyərlərinin təşviqi, əlilliyi olan şəxslərin sosial həyatda üzləşdiyi çətinliklərin dərk olunması və bu maneələrin aradan qaldırılması yolları birgə müzakirə olunub.

Təlimlər zamanı məktəb şagirdləri kiçik qruplara bölünərək problemlərin aradan qaldırılması üçün yaradıcı və praktik təkliflər irəli sürüblər.

Layihə çərçivəsində Forum Teatr təlimləri də təşkil ediləcək, yaddaş kitabçası hazırlanacaq.

Layihənin donoru Qeyri-Hökumət Təşkilatlarına Dövlət Dəstəyi Agentliyidir.